台語民間文學

  教師節、過年，定定接著學生感謝、懷念的批，這是做老師上大的精神安慰。今年接著的這張批，予我誠珍惜。我共伊公開，佮天下的老師分享。作者現在是成功大學中國文學研究所的學生。原文是用華文寫的。 遊山五獄東道主，擁書百面南城王。 萬人叢中一握手，使我衣袖三年香。 ──清．龔自珍〈投宋于庭〉 親愛的老師：          舊年的這个時陣，學生徛佇生涯中的交叉路口躊躇袂定，未來的方向是茫茫渺渺。認真拍拚，都無法度確定是不是有收穫？          一年又閣過去矣，學生又行轉來性命中較安穩的階段，會凍繼續佇校園中生活、讀冊。袂閣再驚惶、迷惑，老師溫和、親切的面像又閣活跳跳浮現佇面頭前。老師對我的鼓勵，是學生心中一股支持的力量，阿─這，囥積佇心中，永永遠遠，比其他較濟有形的助力較長較強，定著會成做學生日後遭遇困境時的有力的源頭；而且，老師對我的鼓勵，是真正實現矣。　 大四的時，才選修老師佇一年級開的詩經課，參大一學弟妹坐鬥陣。 學生開始總是因為一寡戇鈍的表現：考卷上親像peh 樓梯的字跡、共「的」寫做「 の 」， 予老師嚴格來糾正。 見笑的我，才感悟著嚮時的粗疏、懶屍。但是，老師對學生誠懇的叮嚀、關切的眼神，予我真正感受著大學教授真少看著的耐心佮關懷，予學生按「散仙」中醒來。「詩經」變成了一門特別的課：除了牽引我沈浸佇豐沛的文化遺產之中，閣進一步欣賞優美的意境，有「如沐春風」的感覺──實在是因為有 安爾的 老師的原因啊！ 「畢業以後有啥乜打算無？」「不管汝的目標是啥乜，重要的是，一定愛堅持落去啊。」 是啊，老師！老師 hit 時向我行過來的姿態，就親像龔自珍的詩，佇千人萬人中，卻獨獨伸向我的溫暖的雙手啊！大概不是干焦我，老師的心意，一定已經轉變了足濟學生的人生路途。老師的風度言行，學生相信，佇受老師教過的學生中飛颺一股日新的芳味。 行來到校園內一面明鏡的湖邊，雖然不是親像詩中白露微霜的縹渺幽濛，不時會想起當日課堂上老師講授〈蒹葭〉篇的神態，以及內容：蒹葭是按怎媠？老師殷切的提點，是中華文化佮詩經的多情含蓄、溫柔敦厚深刻浸濡所生的學者風度。春暖花開的季節，學生又閣懷念起昔日課堂上佮老師思想的密切交接，老師就是指引了「人生是按怎媠」的一扇光 iann 3 iann 3 五彩燦爛的窗仔。